مدرب سياقة

طقت في راسي ان احط لي دروييول يعني ( سائق ) مع زحمة الشوارع وتوصيل اليهال حق المدارس شفت ان لازم احط سائق طلبنا فيزا والحمدالله عطونا وقدمنا حق الجوازات ومشت الامور وعطونا إقامة ورحنا إدارة المرور نطلب كشه ( رخصة تدريب ) خلال خمس دقائق والا كشة السائق في يده، كل الامور عسل واحلا ما يمكن الحين نبي مدرب سياقة لان حسب القانون لازم اتدرب ،حتى لو كان شوماخر سائق الفورميلا ويبي ليسن لازم اتدرب واهنيه المشكلة تعال حصل على مدرب رحت مدرسة المرور وخذيت قائمة المدربين كلهم اتصلت فيهم كلهم فل الا واحد عقب حنه ونه حصلت واحد يوم السبت الساعة 6الصبح قلنا كل واحد ست ثمان اي وقت ،وصل المدرب شان يطرد الباكستاني من السيارة شالسالفة يالخو قال ما خذ محاضرة حول يله حول والمحاضرة عاد متى باشر يوم الاحد الساعة ثمان الصبح اتصلنا في المدرب يا ابن الحلال الريال خذ المحاضرة قال لا ما بيه هذي خسرني قلنا بنعوضك قال بس خلاص انا خذيت واحد محله، ورديت اتصل بواحد واحد كل فل اخر شي قالي واحد روح المدرسة بتحصل مدرب واروح المدرسة واركض وراء السيارات كاني واحد يبي اغسل سيارة الكل اقول فل اخر شي واحد قالي روح تحت المظلات بتحصل مدربين بتحاضفون الباكستاني او قولهم قنطراز او قولولهم شيف الحال اظاهر هذي كود عندهم وورحنا من مظله الى مظله ولا احد في راضي ادرب وبزور واحد قالي اتصل اتصل فيني عقب اسبوع يمكن واحد ينجح واخذه محله ومشيت واتصلت بواحد وقمت اترجاه قالي شوف تعال يوم الجمعة المدرسة بنشوف هالباكستاني والله ما يندرى صدقه من جذبه ، انا عندي سؤال ليش المرور ما ازيدون عدد المدربين او يتركون المجال حق القطاع الخاص افتحون مدارس تدريب سياقة وافكون العالم من تحكم هالمدربين